العيد باكر .. أسعد الله ممساك

والله ما أدري وين خد جلسته
وين انت ياللي عيدنا في محيّاك

كف القدر من ضيقة الخلق دسته
من يوم ما لوّحت لي كف يمناك
اليوم دمعي بالخفا ما حبسته
ومن يوم ما ذوّقتني حر فرقاك
والياس زَرْعَه في حياتي غرسته
شريت لي ثوبٍ علشان لقياك
والثوب راحت موضته مالبسته
وشريت عطرٍ ما زهاني بلياك
أربع سنين بعلبته ما لمسته
ودفتر قصيدٍ كل يوم يترجاك
مافيه يوم ما سهرت ودرسته













ليته درى صبيحه العيد وش صار
يا هي جرت لي من عذابي هوايل
يوم العذارى بيّحن بعض الاسرار
وجت السوالف بين قيلٍ وقايل
هذي معايدها قبل وقت الاسحار
وهذيك صاحبها عطاها رسايل
وهذي تقول انه لفا البيت زوّار
وهذيك راحت له زياره عوايل
وهذي تفاخر في غلا الصاحب البار
تقول عايدها بكل الوسايل
وانا اطالع فوق .. ويمين .. ويسار
بالعيد ما حتى مشطت الجدايل













باكر يجي ويا شيب عيني من الويل .... من عقب ما سافر سنين ٍ مِديّه
شـ اقول له..! صارو عيالي رجاجيل.؟ .... شـ اقول له ماني بعهده وفيّه
ان قلت له اني تعذبت بالحيل .... وان قلت له اكبر عيالي سميّه
يبـِ يعذرني ويترك القال والقيل .... واللا يجي ويّا زماني عليّه
وان جبت حظي والمقادير تعليل .... واني ضعيفه ورغبـة الله قويه
يبي يصدق كلمتـي دون تحليـل .... واللا يبي ينسـف كلامي عليّه
شـ اقول له ؟ ماينفعـنِّ الاقاويـل .... مادمـت مانـي بعـهـده وفـيـه













رجّال يسوى له ثمانيـن رجّـال
كل الصفات اللي ملكها فضيعـه
له ضحكةٍ تشبه لضحكات الأطفال
ذيبٍ ونظراتـه حنونـه وديعـه
وله فزعةٍ منها المجانيـن عقّـال
وفجوج لا ضاقت عليّ الوسيعـه
ياما عدل عوجا ثقيلات وطـوال
وأنـا معاقبتـه غيـورٌ صريعـه
والله يسوى لـه ثمانيـن رجّـال
والخبل مثلي لا زعل يب يبيعـه













قال الوداع وقلت له بالسلامه
هذي ظروفي دايما جابراتي
مسحت عبراتي بكف الندامه
وتليت من كفه حوايف عباتي
قفى يداري عضه في ابهامه
وقفيت اداري عضه في شفاتي
فرقاه ضامتنـي وفرقـاي ضامـه
وعلى الله الوالي خلـف ذكرياتـي

وعقب البطا أرسل عليّـه سلامـه
يطلب ويرجيني يبـي تضحياتـي
مقدرأضحـي بالشـرف للملامـه
وأمومتـي ترفـض أيتـم بناتـي

من ماحصل لقياك يـوم القيامـه
ماظن تحصـل شوفتـي ياغناتـي













واخر قصايد عابره سبيل (رحمها الله) كتبتها بخط يدها اثناء مرضها
تخاطب فيها زوجها وابو عيالها :



ترى الذبايح واهلها ماتسلينى
وانا ادرى ان المرض لا يمكن علاجه
ادرى تبى راحتى لا يابعد عينى
حرام ما قصرت ايدك فى حاجه
اخذ وصاتى وامانه لا تبكينى
لو كان لك خاطر ماودى ازعاجه
اابيك فى يديك تشهدنى وتسقينى
وامانتك لا تجى جسمى فى ثلاجه
لف الكفن فى ايديك وضف رجلينى
ماغيرك احد كشف حسناه واحراجه
ابيك بالخير تذكرنى وتطرينى
اجيرنى خالقى من نار وهاجه
سامع على ماجرى بينك وبينى
ايام امسى عدل وايام منعاجه
عيالى همى وانا اللى فينى يكفينى
علمهم الدين تفسيره ومنهاجه


uhfvm sfdg