[grade="00008b ff6347 008000 4b0082"]
مراحب يا حلوين..
جبت لكم قصيدة اليوم للشاعر المميز طارق المحياس..
القصيدة بعنوان الياسمين
ليش قلبج يا بعد عمري حزين والله مب لايق عليج هذا الزعل
يا حلاتج يوم انتي تضحكين.. افتحي قلبج وقولي وش حصل؟
من تجرأ من قطف هالياسمين؟ من حرمه الزين قبل لا يكتمل؟
منهو ارخص قيمة الغالي الثمين؟ ويدري انه في عيوني له محل
ومن يقول الورد ما يقطر حنين؟ ومن يقول اته وسط قلبي ذبل؟
يالله قومي.. يالله لا تتكاسلين.. خلي حلمي وياج يوصل لزحل
يالله قومي.. يالله لا تتشاورين.. خلي حبنا يكون للعالم مثل
قالت: اصبر
قلت: انتي تامرين
وطالعتني بعين يملاها الوجل.. ولا اراديا ذرفت دمعتين
وقالت: ان الزين ابد ما يكتمل
قلت: قوليلي ترى سرج دفين ما بخبر حد لو مهما حصل
بس دخيلج ما ابي هالدمع يبين.. مب عشان شي بس والله ما احتمل
طالعتني وقلت لها: شو تطالعين؟ ما في داعي للعواطف والخجل
هذا مب وقته في ويهي تسرحين جاوبي احساس قلبي اللي سأل
قالت: الشدة بعد فترة تلين والفرح يقبل اذا باقي امل
والشقى لازم في يومه انه يهين.. والصعب يأتيه وقت يكون سهل
قلت لها: قوليلي ولا تلمحين ما احب اسمع كلام به جدل
قولي شو الموضوع اذا انج تسمحين وخلي الخوف اللي فيني يرتحل
قالت: أهلي ساوموني بدرهــــــمين!! وقرروا انهم يزوجوني بعجل
جا خطبني شخص قدي بمرتين وجابو المأذون والعقد اكتمل
وافقوا لانهم بماله طامعين وبالتجارة والمراكز والفلل
ليش لا دام انهم رابحين يمكن انهم يطلعون بكم محل
! ! !
قالت: إلحقني إلحقني ومد لي هالايدين ضاع فكري وطار من راسي العقل
من لي غيرك اشتكيله يا الضنين؟؟ عطني رايك عطني لو ذرة امل
صرت انا وياك ضمن التايهين والحزن في دربنا توه استهل
ليش يا دنيا في ويهي تعبسين؟؟؟؟
ليش يا دنيا في ويهي تعبسين؟؟؟؟
ليش يا ربي في ويهي تعبسين؟؟؟؟
حظي المايل متى بس يعتدل؟؟
قالت: تكلم ولو بس جملتين لا تتم ساكت ترى وردي ذبل
قول لي اي شي قول لو كلمتين
وانت بس اللي لأمره امتثل
صدمتي كانت معاها صدمتين
صدمتي كانت في هالمرة دبل
كنت بسألها اش رايج تملكي بي دام خذنا الدبله والحب اكتمل!!
ما نطقت بشي وانا ميت حزين.. والدمع من فوق وجناتي همل
قمت اشاهق ما ابي نوحي يبين .. كني خيل باعلى صرخاته صهل
قمنا نطالع بعض عين بعين.. ما تكلمنا إلين الليل حل
قالت: انطق لا تقول انزين انزين.. وانا ساكت والفرح عني رحل
كنت اظن احنا لبعضنا مكملين.. ما دريت الحظ عاند بالفعل
كنت انا وحدي بعالمها سجين.. وكنت اقول الحظ اخيرا اعتدل
قلت لها: اذكر كلامج لين الحين يوم تقوليلي تراك احسن رجل
صحت فجاة
وقلت لها: تتذكرين يوم كنا نخطط لشهر العسل؟؟؟؟
قلت: عشاني قومي ولا تزعلين.. وارضي بالواقع ما دام انه حصل
اسمج بيبقى وسط قلبي دفين.. والقمر لازم في يوم بيكتمل
والله بفرح دام انتي بتفرحين.. يالله خلينا بعرسج نحتفل
واصفعتني كف عالخد والجبين..
وقالت: انت قاعد تكلم طفل ؟؟؟؟!!
قلت لها: وصوتي بنبراته حزين
اوعديني هالزعل آخر زعل
لان قلبج ينعرف يوم تزعلين
والله مب لايق عليج هذا الزعل
ومهما ناديتج ابد لا تجاوبين
قصة الحب انتهت مااات البطل
افترقنا بعد كل هذي السنين .. وللاسف حبنا في هالمرة فشل
فشل
فشل
انتهى مشوار احلى عاشقين .. كلن بدربه ولكن ما وصل
كل واحد ينسى مع مر السنين .. لكن الذكرى امرها مب سهل
لين آخر يوم في عيني بتسكنين
لين آخر يوم في قلبي تسكنين
لين آخر يوم في روحي تسكنين
في بعض الاوقات اقعد مستكين بس افكر لين يذبحني الملل
بالفعل قطفوا زهور الياسمين
قطفوا الزهرة قبل لا تكتمل
__________________
علمتني الحياة أن أجعل قلبي مدينة بيوتها المحبة وطرقها التسامح والعفو وأن أعطي ولا أنتظر الرد على العطاء وأن أصدق مع نفسي قبل أن أطلب من أحد أن يفهمني وعلمتني أن لا أندم على شي وأن أجعل الأمل مصباحا يرافقني في كل مكان
[/grade]
رد مع اقتباس
المفضلات