الباشمل بطريقتي سهلة ولذيييذة _ بالخطوات المصورة
كيفكم يا حلوين
سويت اليوم ع العشا صينية بشمل امممممممممممم طععععععععععععمة
قلت اصورها وانزلها لكم عشان تجربوها وتستمتعوا بطعمها وتراها سهلة ومش معقدة ابدا
بسم الله نبدا
* اولا اسلقي المكرونة .
* ثانيا حضري الصلصة الحمراء كالتالي :
- حمسي بصلة كبيرة مقطعة شرائح رفيعة مع شوية ثوم وعرق فلفل
- حطي عليها دجاج مكعبات او شرائح ويفضل صدور اسهل واطعم
- قلبيه لين ياخذ لون وحطي علي بهارات /ملح /فلفل اسود وابيض /رشة بابريكا
-قطعي نص فلفلة رومية مكعبات صغيرة وحطيها على الدجاج وقلبي
- حطي عليه حبة طماطم كبيرة مقطعة صغير + معجون طماطم وقلبي
- حطي عليه شوية ماجي /رشة زعتر بري "اوريجانو"
- زيدي عليه نص كوب ماء وغطيه وخليه يتسبك وتطلع الصلصة بالصورة هذي
* ثالثا حضري الصلصة البيضاء وطريقتها :
- في قدر متوسط حمي ربع قالب زبدة صغير + زيت تقريبا 4 اغطية
- حطي عليه 5 او 6 ملاعق كبيرة دقيق وحمسيها لين يشقر لونها
- تكوني محضرة قبل في زبدية كبيرة تقريبا 6 كاسات حليب وتضيفي له ملح /فلفل اسود وابيض /ربع ماجي /تقريبا نص بصلة صغيرة شرائح وممكن تشيليها بعدين /2 او3 ملاعق جبنة سايلة المراعي بالقشطة "كنت احط جوزة الطيب بس سمعت انها حرام فبطلت "
- تضيفي نص كمية الحليب اول على الدقيق وتحركي تمام لين يمتزج ضيفي الحليب الباقي وحركي لين يثقل المزيج ويطلع البشمل زي كذا
على فكرة ممكن لما يبرد البشمل تحطي عليه بيضة وتقلبيه وهذا اختياري
* نيجي للتطبيق :
- جيبي صينية بايركس وادهنيها بشوية من الصلصة البيضا
- حطي نص كمية المكرونة
حطي عليها الصلصة الحمرا
حطي عليها شوية من صلصة البشمل مع رشة موزاريللا
- حطي باقي المكرونة
- كبي عليها البشمل ورشي عليها موزاريللا " بس خلي شوية بشمل للتغطية "
- الحين غطي الوجه بباقي البشمل
- دخليها الفرن من تحت 10 دقايق وحمريها من فوق
وبالعافية على قلوبكم اتمنى تعجبكم وما تبخلوا علي بالردود الحلوة
رد مع اقتباس
المشاركة الأصلية كتبت بواسطة رفيق الاحزان
المفضلات