لو تلاحظ هالايام بعض شبابنا الله المستعان بتشوف العجب العجاب
بداية من اخلاقهم واسلوب تعاملهم انتهاء عند هيئتهم الظاهره للعيان..
يا تلاقي الأخ مطول الشعر ولابس هالجنز والقميص المخصر بألوان
فاقعه ومصفف الشعر سبايكي بالجل اما اذا كان طويل يضطر انه
يستشوره والا يربطه بربطه سعنونه ولاينسى ينزله قذله على
الوجه البشوش..
تعال شوفهم بالأسواق ..شوف حركات الترقيم وتغميزاتهم لدرجة
اللي معدوم من الغيره يخلونه يغار وهو مايدل دربه ..
تلاقي ذاك العربجي اللي بنطلونه يدخل ثلاثه بوسطه ولابس لك ذاك التيشيرت
اللي كله كتابات ورسومات ماسخه ويتمشى و فيه نوع منهم اللي مشيته
تلاحظ ان خطواته فيها كبيره ويدينه للورا كنه رايح يبي يتطاق
والزقاره بيده ويقز بهالعالم وبعضهم مسوي برئ الرجال تشوفه
جالس لوحده هذا يشحن عمره عشان يطلق النظرات الاجراميه
وتلاقيه يمس شواربه يعني شوفوني عندي شنب توه طالع باركولي..
كله كوووووم والخكاريه كوم ثاني يجيك واحد خكري سكبه ع الفاضي
وحاط بيده دبله وهو ماحولك احد وفاتح ثلاثة ارباع صدره وراز عمره
بالمجمعات هذا من الناس اللي مستحيل مستحيل يتخلى عن العلك يحس
انها رمز اناقته العجيبه..
وفيه ناس غير عن اللي توه ذكرتهم هالنوع عمهم وحارق دمهم
يجي كااااشخ بالشماغ اللي راشه نشاء لين قال يرحم امك خلاص
ومسوي شخصية الكوبرى والثوب شبرين بالأرض وسكسوكه
حافها وصابغها اسووود مية مره يالله ضبطت معه ذيلي "الرجاء
ممنوع الاقتراب" بصراحه هم الوحيدين اللي ارحمهم من قلب ويكسرون
خاطري حيل اذا شفت ذيك الرقبه المشبصه لاحراك ولاتحريك
مو قادر يلتفت لامنا ولامنا بس عيونه ماتقصر تقوم بالواجب وزود..
خل هذا كله وشوفهم بسياراتهم فالشارع يووووووووه هنا الطامه الكبرى
بعضهم يشغلون المسجل ع الآخر والمشكله انه اجنبي ويالله ردح ردح
ماعندهم تفاهم مصدقين انهم فاهمين شقاعد تقول الاغنيه وهم والله
مايدرون وين الله قاطهم تلاقي كلماتها كلها سب فيهم وهم يضحكون
ومستانسين ..والسياره رايحه بخرياط ام من جابتها تهتز بقوووه من الردح
اللي بداخلها وتشوف دخان الزقاير طالع من الشبابيك واللي جوه مايشوفون
بعض من كثره صايره السياره مغيمه ومعليش يعني لاحد يناقشهم والله
ان تندم ع اليوم اللي عرفت نفسك فيه الطقاق الشغله الوحيده اللي صاحين لها..
اتمنى اتمنى من شبابنا يلتفتون لانفسهم ويخافون من ربهم ياليت لو يعدلون
تصرفاتهم ويصيرون ناضجين يفكرون بمستقبلهم ..
اتمنى يحسون بالمسؤليه وانهم عماد هالامه فاذا كانوا بيظلون على هالطريقه
فعلى الدنيا السلام ..ماقول الا الله يستر من الاجيال الجايه..
رد مع اقتباس
المشاركة الأصلية كتبت بواسطة R@W@N
المفضلات