ما في شي يستحق الحسايف
دنيا العنا ما تستحق الحسوفه
خلك على دينك حريص وخايف
من ضاع دينه زاد همه وخوفه
اهتم بارحامك وبرّ الولايف
من يقطع الارحام بقعا تلوفه
لامك وابوك تصير خاضع ورايف
عمرك ترى امك تستحق المروفه
لا تلتفت للي مع الناس طايف
العبد رزقه ياخذه ما يطوفه
لا تلحق النفس الشقيه كلايف
استهدي بالله ما تميد الكلوفه
باكر الامور تصير باكر خفايف
والصعب باذن الله تزايد خفوفه
سدد وقارب للهدب ونت شايف
لا تطرد الي بالنظر ما تشوفه
لا يخدعك منظر به الحسن زايف
كم منظرن تجلبك ظاهر زيوفه
لا تطرد المقفين لا صار عايف
الي يعوفك يبن الاجواد عوفه
واحذر تطيح بحبنا بالردايف
لا يسحرك لا شفتنا باللقوفه
الي عليه من المشاريه حايف
حلال قومن كل بيدن يحوفه
ابحث عن المظنون راقي الوصايف
لا يخدعك الي ظهر من وصوفه
خلك من الله دايم الدوم خايف
والي عدا ربك حرام تخوفه
رد مع اقتباس
المفضلات