جيت اتعلق بالنخيله وزليت
.........................أشوى والا راح عضدي عدامي
ماعندي ْالا القطو وأقول يا شيت
.........................القطو والله مادري وش علامي
ياقطو أنا والله على نفسي أخطيت
.........................وعرضت روحي للخطر والملامي
أشره على رقي النخل ماتدانيت
.........................وأنا عجوزماتشيلن أعظامي
قالوا أعيالي قوه معنا وعييت
.........................هذا ردى حظي وقل اهتمامي
أخاف الا مني عن الدار شديت
.........................تبكي اعسيله ما تريد الظلامي
تبين احوفه كل ماأصبحت وأمسيت
.........................أوريه زولي وتسمع كلامي
أحب أنا داري ولا أظني أخطيت
.........................من حبها عيت أعيوني تنامي
ماأحد مصدقني ولو صحت وأوميت
.........................الأمر لله ما يفيد الكلامي
يالله ياللي فوق خلقك تعليت
.........................يالدايم اللي ماألخلقك دوامي
اغفر لي ذنوب جنيته ولا أحصيت
.........................مضيت عمري بالكسل والأثامي
ياواسع الرحمه لعفوك ترجيت
.........................أنت الكريم وزابنك ما يظامي
وختامها ذكرت ربي وصليت @
.........................على النبي عد الجراد التهامي
رد مع اقتباس
المفضلات