الحلاق
مهنة تراثية من عُمق الماضي
بقلم : الداعي بالخير : صالح صلاح شبانة
يمنع وضع اى ايميل
صورة بائدة من الماضي البائد عاشها وأستوحاها
الدعي بالخير : صالح صلاح شبانه
*******************
بقى الحلاق حجر زاويه ما في عنه غِنى
غُب الطَلَب والحاجه،جُعبته مِثل جُعبِة الساحر حاويه .
حلاق ذَقِن وراس ، وفرشايه مبلوله بالميه والصابون،
تِسبَح عالوجه وتعوم ، إتلاقيها عالوجه راغيه.
إلمحلقه إتلاقيها إذاعة البَلَد ، أَخباره إمباركه ،
الكلمه في دِكانته سطر ، والسطر صفحه ، والناس عن لسانه راويه.
إلجَمعَه عنده ما بِتخِس ، لسانه أسرَع مِن طقطقات لِمقَص ،
بِوَردَك إلبَحَر وبِرَجعَك عطشان ، كِل بَركتَه باللسان ،
بِحكي قَد عَشَر نسوان ،ما بِفوتَه فايت ، ولا طَبيخ بايت ،وما بتخفى عنه خافيه.
حلاق الذقن والراس ،وقلاّع إلسنان وِإلضّراس ، سبع ليل قَوي إلباس ،
حكيه مرَتَب عَالاُصول ، كلُه عالسجع وِالقافيه.
مداوي إلجَرِح وِالكَسِر ، رادد إلخَلِع مقفِل إلظَهر ،إمطَهِر إلصبيان ،
إمداوي الدَماَمِل إمطفي إلاَحزان ، حارِس في وجه كِل داهيه .
********
بقى إلحلاّق خبير بحجم الراس ، وقديش نُمرِة الطاقيه قَبِل إلّحَلقَه و بعِدها
يُمزُط شَعر إلَرَاس ،إتلاقي إلقّرعَه مثل إللَمبه ظاويه .
بَقَت إلقَرعه عنوان ، لَكِل لِولاد والصبيان ، زِيّ مدرَسي ،
إيجرها بِالماكِنه إلمنقوعَه بِالكاز ، تتصير مِنِ إلشَعَر حافيه .
ولَلرعيان إولاد إلرعيان ، إيلَبِس إلراس زبديه ، حَلقَه عربيه أصليه ،
صدّرناها للامريكان ، وصارت حلقه عالميه راقيه .
إتخاطفتها إلأُمَم وإلشعوب ، بعِد سحب جنسيتها ، وتغيير تسميتها ،
وصِرنا نِشتريها بالعمله إلصعبه إلوافيه .
وللجرح في إلوجه والراس ، شقفة شَبَّه يمسح إلجرح فيها ،
يتوقَف نَزيفَه إبلَحظَه أقَل من ثانيه .
موسَه مسنون على طول ، يُزُق عليه تَيصير مبلول ،
ويسحَبه عالِقشاط إتلاقي إيده رايحه جايه .
حلاق مُبدِع عالأُصول ،شغله إمرَستَك على طول ، حَكياته أسرَع من طقاته ، عنده خراريف إجبينه والغول ، وأخبار إلناس إلسكَه وإلراقيه .
مطهر وطبيب جراح،محترم وين ما راح،العامل والفلاح ،
وِموظف إلميري ، زباين للحلاق، والموجوع إللي أوجاعه حاميه .
لَن قال يا كشلي آخ إيلاقي إلحلاق حاضر ،إيداوي إبصِدِق وإخلاص وطيبة خاطر ، أعشابه يُقطفها من كِل إعراق ورابيه .
بِعرِف زيّ إلعطار ، بالنبات وإلأشجار ،مثل إلبُلبُل فُريره طيار ،
خُرج إلدوا ع َالحمار ، أي نَعـم مُعداته بسيطه ، بس إيده شافيه .
إيد ألله فوق إيده ، أَتخَن كسر ، إبفَلقِة صابونه ،
وشريطه بالنظافه مضمونه ، وبأكَم من بيضه ، وعيدان صحيحه مش لاويه .
إيلف إلكَسِر و على ألله إلجَبِر ، حَركَة إسبوع إسبوعين ، إيفِك إلربطه ،
إتلاقي إلطَرَف مِثِل إلإَليف ، واقف بلا قافيه .
حَلاّقنا مُخلِص أَمين ، لولا هاللسان إللي بِعلِك سيرة إلبَني آدميين ،
شُغلَه شُغُل إمرتَب عالقِده وِالميازين ، ونِيتَه صافيه ,
بقى إلحلاق في هَذاك إلزمان ، بالمعنى إلتمام إلمليان ،
ضَروره ما بستغني عنها إلإنسان ،مثل صحن إلصيني رنان ، لَمَساته حانيه.
*****************
بقت دِكَانة إلحلاق زغيره ، فيها كُرسي وِ مرآه ، وماكِنَه مَنقوعَه بِالكاز ،
و فُرشايه إبزِبدِيه إزغيره ، وبَرّوِة صابونَه مَهزولَه و ذاويه .
ومقَص إمجَلَخ وموس مَسنون ، ومُشِط للراس ومشوط للماكِنَه ،
و أكَم مِن فوطه ، وقزازة ريحا ع زيت شَعَر ع سبيرتو للصحه وِالعافيه .
بَقَت لِحلاقَه صَنعَه ما فيها إبداع ، حَلقَه إنكليزيه أُختها للزِبديه ،
وع َالصِفِر لَولاد إلمَدارِس .. لِمفَرّعه وِ لّحافيه .
كِل إلناس فُقَرا ع باب الله ، رِزقتهم يوم إِبيوم ، إقلوبهم نَقيه ،
عِنوانهم مَحَبه ، ما بينهم أحقاد ، لا مَدّفونَه و لا طافيه .
بَقَى إلحلاّق فَرد مِن إلقَريَه ، مِتفَرِد بِالمهنَه ، شُغلَه بِالفَي وِحَدّ المَي ،
مِش مِثل إلفلاح إللي بَرّه ، في إلأيام إلسِقعَه وِإلدافيه .
في الحَر وِ القَر ، إتلاقيه سارح عَرَقَه مََرقَه ، وِِلاّ اسنانه إتصُك....
ورِجليه إترُج ، راجي رحمة الله ، ساتر إلفَقِر بالعافيه .
بقى إلحلاق يِتعامل مع أجسام ، إلطبيعة حصنتها بالقوة وِإلصحه ،
ولو بَقَت مثل إجسام اليوم خيخه و مِن إلصحه خاويه .
كان بَقَت مواسِم إلموت أكثر مِن مَواسِم إلفرَح ، بَس إلرَب كَريم ،
ونية العبد الغشيم ، أعطتنا عافيه ، قد ما مشت الجاجه حافيه
تقرأ بلهجة أهل سنجل
رد مع اقتباس
المفضلات