اقره ولا تمسحه خله سنينا يقرونه اهل العشق واصحاب الالباب
ياراعـي البـاب الحديـد انتهينـا
لاتعتذر مابـي معاذيـر واسبـاب
حنـا علـى عهـد المحبـه أتينـا
وين الهلا والمسهلا بيـن الاقـراب
وين انت ذاك الـي يجـي يلتقينـا
عطره يفوح ويفتح البـاب ترحـاب
حناعليكـم ليتـنـا مــا لفيـنـا
خابت اماني لهفتي والامـل خـاب
طرقـت بابـك ليـن كلـت يدينـا
وش فيك ماتفتح وانا سيد الاحبـاب
اخبرك في بـاب الهـوى تحترينـا
ماهو ظلالي يحتريني علـى البـاب
من عقب ماجينـا ورحنـا وجينـا
صرنا بلا ذنب على بابك اغـراب
لا تعتـذر حنـا نسيـنـا نسيـنـا
تلقاعلى بابـك كتبنـا لـك كتـاب
اقـره ولا تمسحـه خلـه سنيـنـا
يقرونه اهل العشق واصحاب الالباب
مفـاده انــا للـفـراق انتخيـنـا
وان الفؤاد الي يبـي قربكـم تـاب
حنـا عطينـا قـد ماحنـا خذينـا
العشـق للعشـاق والنـاب بالنـاب
يوم انت نبـراس العطايـا عطينـا
تعطي وفا وازيدك اعجاب واعجاب
واليـوم حنـا بـا لنوايـا درينـا
زدني هجر وازيدك غياب وغيـاب
هـذا كتابـي واكتفينـا اكتفيـنـا
ماعاد لك فينـي مشاريـه وعتـاب
لا تحسـب انـا بالفـراق ابتلينـا
(والله وربي ماحسبنا لك حسـاب )
يعني تـرى فـي غيبتـك ماعلينـا
سالي ومتعافـي وعاشـق وجـذاب
نزلت فـي سـوق الغـرام ونقينـا
واخترت مالذّا لقلبـي ومـا طـاب
ناس تعرف الحـب وتمـوت فينـا
واحبهـم والله ولانـي بمـرتـاب
احلا كـلام الحـب ينسـب الينـا
واعذب كلام الشعر فالقلب صبـاب
بعنـاك مجانـي وغيـرك شرينـا
والبيـع مجانـي للاهـي وكـذاب
يامـا علـى لقيـاك الاول سعينـا
يوم انت كنت تعدنا سيد الاصحـاب
والحين خلك فـي غيابـك سجينـا
بينك وبين اهل الهوى ستر وحجاب
ما عـاد ينفعـك البكـى والونينـا
ماعاد افكر فيك لـو تفتـح البـاب
أتمنى أن ترتقي لذووقكم الرفيع
رد مع اقتباس
المفضلات