يتوه بخافقي النابض حكاية حب مكتومه
وكتبتها على صفحات كراسي
بأقلامي
يحن لها هواي العذب في مقياله ونومه
ولا مني غفيت شوي جتني بروع احلامي
يداعبني الخيال وراح يحكي لي عن علومه
وانا شوقي معنيني ودمعي ذاب بكمامي
تعبت اتصنع البسمه على محياي مرسومه
وأجامل كل أصحابي واقول بخير لعمامي
ونار الشوق تكويني وجوا القلب مضرومه
وانا صابر ومتحمل وجرحي في الحشا دامي
غرامك هيض أحساسي وروحي فيك مغرومه
يضيم الليل هوجاسي وانا ساهر ولا نامي
تفرعن حبك الطامح وانا والله مالومه
لأنك اجمل انسانه فريده يالغلا السامي
وزينك قمة الروعه ورقه فيك ونعومه
وغصنك كل ما ميل يهز الخافق الضامي
وطرفك كل ماسلهم هدبها ترمي سهومه
وصابتني وانا كنت احسب اني في الهوى رامي
وخدك لاظهر نوره يغار البدر ونجومه
وغارت كل مزيونه ولا والله تنلامي
شروق الشمس لابانت يلبسك أجمل هدومه
أخذتي حسنها الساطع حقيقه ماهي أوهامي
حلاتك فاقت اوصافي وهذي بس معلومه
انا ماشفت مثلك في اليمن والهند والشامي
ولا بأرض السعوديه ولا البحرين محشومه
ولا في موطن التركي ولا في دار الأهرامي
ترى بنات الحي قالن احمد أش قومه
حسافه طبعه تغير تنكر سالف العامي
تناسى يوم كان صغير لعبه أكبر همومه
ولا منه زعل يكفخ مزون وهند وأريامي
أنا يابنت عشقي غير ما يرخص السومه
أنا باقي على عهدي وتشهد بصمة ابهامي
أنا جيتك وانا شامخ وراسي عانق غيومه
ولا غيرك خذت قلبي ولا ملكتها هيامي
انا جيتك وكلي لك شروع الحب وسلومه
ابيك تبلسم جروحي وتبري العوق وأسقامي
تراني ماعشقت من الأسامي غير ( )
نحت حروفها من بين شرياني
وصمامي
انا بهدي لك ورود الكون وريحانه وياشمومه
وروحي فدوه لرحوك وتفدا قدرك السامي
رد مع اقتباس
المفضلات