ياعناد عاندني زماني ولا زلت
العاصي الي غير لله ما طاع
ولو مالت الدنيا فنا عدل ماملت
وارسي كما ترسي الرواسي على القاع
وبركت لحمول الليالي وحملت
وقطعت دو تايه الرآي به ضاع
ولاني بزمال على المتن زملت
وجيتك وحملي على متن وذراع
أمشي وعر حافي قدم ماتخاذلت
وأسري مساري حايم الذيب وان جاع
قطعت قفر موحش فيه ماخلت
الا الوحوش الضاريه بين الارياع
انا بدوي ماهالني شي واهتلت
اعيش عادي بين غابات وسباع
شبيت ناري بالعلم فوق وأشعلت
يوم الظلام اضفى على عيوني قناع
وحيد مع سحم الضواري تتعللت
في مدهلن مابه من الونس فزاع
ماغير بحروف القصيده تمثلت
واجاوب الي يزعج الصوت ملتاع
ياليل طالت علتي وانت طولت
متى يجي ياليل لصبح مطلاع
وحالن عن الديره وانا مثلهن حلت
وكلن على مايهتوي ضامره زاع
وطفت الجنوب وبه مشيت وتجولت
وضاقن علي الي على غيري وساع
وحتى الشمال الي وصلته وشاملت
الرآي ضدي صادر اليوم بجماع
وحاولت احل ولانفع يوم حاولت
وتعقدت عندي على كل الأوضاع
كني على دم الليالي تطاولت
واليوم في دمي غدا الوقت طماع
وطالت وطاولت الليالي ولاطلت
الا الصواب الي نقلته بين الاضلاع
وعز الله اني لشفا وان تماثلت
من كفها كالت على الصاع لي صاع
ومهما تزيد بجورها ماتوسلت
وأصبر بعد لوكنت للمر جراع
وبعض الدوا عنه للأوجاع فضلت
وأخترت عن حلو الدوا مر الأوجاع
انا بدوي طبعي كذا ماتبدلت
قصة وفا تمشي على كون خداع
بالمال وكنوز الذهب ماتجملت
انا جمالي دين وأخلاق واطباع
احل في دار المعزه ولا شلت
وانا خوي الي لدنياه بياع
وانا على منشي السحايب توكلت
الخالق الي لسموات رفاع
ياعناد هذي قصتي يوم سجلت
والناس بالدنيا ترا اشكال وانواع
وتسلم بعد عمري اذا اقفيت واقبلتي
يالنادر الي لك على التل ميقاع
[[ محمد فياض الحويطات ]]
رد مع اقتباس
المفضلات