السلام عليكم ورحمة الله وبركاته ..
( طـــــــــــــال شـــــوقي إليـــــــــــك يارمضـــــــــــــــان )
هذا الموضوع عبارة عن جدول رمضاني..بما أن رمضان قرب..وقته..فأتمنى من مشرفي القسم تثبيته..:)
الله يبلغنا إيااه ياارب ويبلغنا الطاعة فيه والعتق من الناار...والعفو والعافية...
أخوااني...إلكم هذه الرسالة..فها هو رمضان لم يبقى عليه شيء.. فما استعداداتك لهذا الشهر الكريم؟؟
فكم من الفضل فيه..فيه تصفد الشياطين..وتبقى النفوس.. فيامن يريد الإخلاع عن ذنب.. هذه فرصتك في رمضان..فرصة التجديد..هو فرصة التغيير الجذري...!!!
هل تعلم أنه عندما تريد التغيير النفس تحتاج إلى 20 يوما فقط حتى تستطيع أن تتغير وتعتاد على هذا التغيير؟؟
ورمضان يوجد فيه 30 يوما.. تستطيع فيه التغيير وتثبيت التغيير..ففي ال 20 يوما الأولى تستطيع التغيير أو الإقلاع عن الذنب..وال 10 أيام الباقية هي تثبيت..أي أنك تثبت هذا التغيير فانتهزوا هذه الفرصة...اتركوا كل معصية تبعدكم عن الله وعن العبادة في رمضان..ففي هذا الشهر تستطيع أن تكون من العتقاء من النار..فماذا أعددنا لهذا الشهر العظيم؟؟؟!!
أخواني...الحين أنا وياي فكرة وأتمنى انكم تطبقونها حتى تستفيدون..وهاي الفكرة عبارة إنا نكتب جدول فيه كل السنن والطاعات اللي نريد إنا نساويها ولكن خلنا من الحين نحضّر ونييب ويانا الورقة والقلم ونسوي الجدول حق 30 يوم..وإذا كتبنا مثلا في هالجدول إننا في رمضان نوينا نسيب الأغاني وأخلصنا النية ودخل علينا رمضان وبدينا في اللي كتبناه في الجدول ووصلنا لليوم ال 15 واحنا نسوي جينا ليوم 16 بدينا نتكاسل وما سوينا ووقفنا بعض الطاعات تعرف إنه الحين يكون مكتوب لك انك سويت الشي هذا لمدة ال 30 يوم كاملة؟؟!!!!
يعني صح انك ماسويت العمل هذا ال30 يوم كامل بس بكرم ربنا وجوده علينا تنحسب لنا إنا عملناها لمدة 30 يوم فتأملو كرم ربنا واحنا مب مسويين ولاشي له بالعكس اهو خيره لنا نازل واحنا شرنا له صاعد...وطبعا..أهم شي في الموضوووع كله النية..أهم شي انك تخلص النية..بترك هذا العمل...
فكرة الجدول انه رح يكون فيه كل الأعمال اللي رح نسويها من فروض وسنن..وغيرها من االطاعات..
_ اول شي نبدأ يومنا من الفجر..طبعا قبل الفجر..سنة الفجر..وعقب السنة نصلي الفجر..وعقب صلاة الفجر..واحنا بعدنا ع السجادة مانتحرك منها..نقول أدعية بعد الصلاة..
ونقول.."سبحان الله وبحمده عدد خلقه ورضا نفسه وزنة عرشه ومداد كلماته" >>قولها 3 مراات..من السنة..وأجرها..مثل عبادة الله عز وجل 4 ساعات كاملة..
هذا كله وانت تكون بعدك ع السجادة...ونقول بعد أذكار الصباح..ونيلس نقرأ قرآن..الين تشرق الشمس..عقب نصلي صلاة الاشراق..اللي هي ركعتين..الاشراق..>>من جلس من صلاة الفجر الين تشرق الشمس وهو في عبادة وعقب صلى صلاة الاشراق..كتبت له اجر حجة مع رسول الله صلى الله عليه وسلم...طبعا العبادة تكون قران دعاء..استغفار..>>كل انواع العبادات..
_ بعد الصلاة اغلبنا رح يرد ينام..اللي مارح ينام يجلس يقرأ قران..ويستغفر الله عز وجل..ويتعبده..
واللي رح ينام..عقب مايصحى عشان يروح الدوامات..وقت الضحى نصلي الضحى..>>صلاة الضحى 8 ركعات..بس احنا رح نقسمها عشان ناخذ أجرأكثر من سنة في وقت واحد...شوفو كيف..
اول 4ركعات..نصليها عقب مانصحى..في البيت..بكدا تنكتب علينا سنة..والـ 4 ركعات الثانية..ركعتين نصلييهم..يوم نكون في السيارة..هذا طبعا للي مايسوق يعني يروح مع السايق او اياكان..نصلي ركعتين في السيارة.. وبكدا تنكتب لنا سنة الضحى وسنة الصلاة في السيارة ( يعني في دابة ..... والصلاة في الدابة سنة بس لـ السنن) ..وسنة الصلاة بالجزمة أكرمكم الله ( والصلاة بالجزمة بعد من السنة ) كدا أخذنا 3 سنن في وقت واحد ...
والركعتين الباقية نصليهم لمن نوصل المدرسة أو الدوام عشان أكثر عن أرض تشهد لك انك صليت الضحى عليها...
والمدارس اللي مافيها فسحة لصلاة الضحى يروحوا مجموعة من البنات أو الأولاد يكلموا الإدارة... ويقولون حقهم انهم يخلون لهم فسحة يقدرون يصلون فيها الضحى.. وأصلا رح يكونوا بس رح يصلوا ركعتين يعنيي ما رح تاخذ وقت>>أتمنى من الطلبة اللي ماعندهم فسحة لصلاة الضحى من صدق يكلموا الإدارة..وبعد مايخلصوا من الركعتين يقعدوا يقرأوا قرآن الين مايرن الجرس وتنتهي فسحة الصلاة والطلبة كل ما شافوا نفسهم فاضيين يروحوا يقرأوا قرآن وينصحوا ربعهم يقرأو وياهم لأنه هو شهر واحد..
_ صلاة الظهر..يوم يدخل وقت صلاة الظهر..نصلي قبل الظهر.. 4 سنة الظهر وعقب نصلي الظهر وعقب نصلي 4 ركعات بعد الظهر...
_ صلاة العصر نصلي قبلها 4 ركعات وهاي ال 4 ركعات من السنة...بس مب من السنن الرواتب ..وعقب نصلي العصر...
_ وقبل المغرب نرتاح شوي..ونجهز الفطور ونروح نفطر تمر ونشرب لبن ونصلي المغرب>>طبعا قبل الفطوور نجلس ندعي..ونقول الدعاء اللي قبل الإفطار.. عقب نكمل فطور كامل من مقليات وحلا وغيرها...>>طبعا عقب الصلاة..
ومن السنة انك تتمضمض بالماي بعد اللبن فلا تنسوا تتمضمضون لأنه من السنن المهجورة..
ولاتنسوا لعق الأصابع بعد الأكل لأنه بعد من السنة..
عقب ماناكل التمر واللبن نصلي المغرب وعقب المغرب نصلي ركعتين السنة وعقب نروح نكمل باقي الفطور ولاننسى الدعاء قبل الفطور ولا تنسوني من دعائكم...:d
عقب الفطور اللي متعود يروح يتفرج تلفزيون شو رايه يغير وجهته ويستوي بدل التلفزيون يقرا قرآن ؟؟واللي يتابع تلفزيون ترا ما يحس بالخشوع في رمضان شرات مايحس الناس اللي ماتتابع
ترا لا طاش ماطاش رح يفيدكم..ولا حاير طاير...وهو شهر واحد اكثرو فيه الطاعات واجتنبوا المعاصي..
_ وعقب نستعد حق صلاة العشا والتراويح أول نصلي العشا وعقب ركعتين السنة وعقب نصلي التراويح بالنسبة للحريم عادي يصلون في البيت أو المسجد وعقب نقرأ قرآن
ولا ننسى نقوم الليل بس إذا صليت الوتر في التراويح مايصير يصليها مرة ثانية في القيام..بس عادي يصلي قيام الليل..
**صلاة الوتر اللي هي الركعة اللي يجلس الإمام يدعي فييها..ولا تنسوا قراءة القران في الليل لأن قراءة الليل مشهودة ولا تنسوا الدعاء في كل وقت...
عدتي وعتادي في كل وقت في رمضان ..
× نفض الفراش..قبل ماننام...لأنه من السنة...>>ووقت ننفض ماننسى نسمي بالله..ووقت ننام..ننام ع الجنب اليمين....والمحاولة قدر المستطاع عدم النوم على البطن لأن الرسول صلى الله عليه وسلم..نهى عن النوم على البطن...
× أذكار الصباح والمساء وأذكار بعد الصلاة...
× الإكثار من قول " اللهم إنك عفو كريم تحب العفو فاعفو عنا "
× الرجال لا ينسون كل صلاة ترا واجب عليكم تصلونها في المسجد..>>وااجب..يعني لا تتكااسلوا..تأثموا لو ماصليتوها في المسجد..مارح يااخذ منكم شي>>اونكم تتحوطوا في الحارة..لول
× الإكثار من الصدقة..ومن مشاريع الصدقة>>اشتري كرتون ماي ووزعه في المسجد واشتري تمر ووزعه في المسجد وبكدا تكون فطرت صائم وترا صدقة الماء صدقة عظيمة..وأجرها كبييير..
× الإبتسامة " تبسمك في وجه أخيك صدقة " وهي ماتاخذ منك
شي...بالعكس..رح تخلي الناس ياخذو عنك انطباع حلو..
× الإخلاص في الصيام..واخلاص النية أهم شي في الأعمال...
× في رمضان تقفل أبواب النيران وتفتح أبواب الجنان...
× من كان في وضوء أو يقرأ قرآن أو يستغفر أويسبح أو....الخ في ليلة القدر كأنه يعمل العمل 83 سنة و 4 شهور...
× الدعوة في رمضان لا ترد...
× أجر السنة في رمضان يعادل فرض....
× تقدر تختم من الفجر لين الإشراق من القران 3 أجزاء ومن المغرب إلى العشاء جزئين...فلا تتكاسل..
× تعجيل الفطور وتأخير السحور...من السنة
× عدم الغيبة والنميمة...>>رمضان ما اعتقد حد يريد ياكل لحم أخووه حتى في رمضان!!!!!!!
× (يوم من عمرك وقربت من قبرك ومرت سنة كم يوم قربت من قبرك بقي الإثم وذهبت اللذة والطاعة ثبت الأجر وذهب التعب ) فماذا استفدت؟؟؟؟
× يوم تقول " استغفر الله الذي لا إله إلا هو الحي القيوم و أتوب إليه " 3 مرات..غفرت لك ذنوبك كثر منها وخصوصا ليلة القدر...
× حضور مجالس العلم...الله يغفر للي يحضر المجالس اللي يتذاكرون فيها اسمه...وللي يحضر مجلس العلم هدايا كثيرة من رب العزة والجلال..منها..قم مغفورا لك..والملائكة تستغفر لك..حتى الحيتان في قيعان المحيطات تستغفر لك..يذكر اسمك في الملأ الأعلى...وغيرها الكثير..وباااكثرة مجاالس العلم في رمضان...استغل الفرص..واحضرها..ولا تفوت عليك الأجر الكبييير...
× بر الوالدين..وكسب رضاهم..
× مساعدة المحتاج..ولو كانت حاجته قلييلة..
× حفظ ولو القليل من القران...
× عليكم بهذا الدعاء " اللهم اسلل سخيمة صدري "
× قراءة آية الكرسي بعد كل صلاة ما يمنعك عن الجنة شيء إلا الموت...
× وماننسى التحصيين...في الصباح والمساء..
× التكبير عند الصعود..والتسبيح عند النزول...من السنة..
× استخدام السواك..قبل الصلاة..وفي كل وقت...من السنة..وهو مطهرة للفم مرضاة للرب..
× تكحيل العين..بكحل..اسمه..الأثمد..>> وطبعا..الحريم يوم يكحلوا..مب يخرجوا..بعيونهم المكحلة وهي باينة..المفروووض يغطوها..لانه يعتبر تبرج....والتكحيل مب بس للحرمة للرجل بعد..
× تمشيط الشعر بالمشط من السنة...
× يوم ندخل السيارة نقول "سبحان الذي سخر لنا هذا وما كنا له مقرنين وإنا إلى ربنا لمنقلبون سبحان الله الحمد لله الحمد لله الحمد لله الله أكبر الله أكبر الله أكبر سبحانك اللهم اني ظلمت نفسي فاغفر لي فانه لا يغفر الذنوب الا انت "عند قول اللهم اني ظلمت نفسي فاغفرلي فانه لا يغفر الذنوب الا انت..ابتسم ابتسامة رجاء من الله انه يغفرلك.. والرسول صلى الله عليه وسلم كان لمن يقول دعاء ركوب الدابة كان يبتسم.. وها الدعاء من يقوله.. الله عز وجل يضحك له ومن يضحك له الله يدخل الجنة من غير حساب ولا عقاب بإذن الله والله تعالى أعلم...
× حاولوا دراسة ومعرفة اسماء الله الحسنى..ومعانيها..وصفات الله جل في علاه....
× بعد الوضوء لاتنسوا قول " أشهد أن لا إله إلا الله وأشهد أن محمد رسول الله "
" اللهم اجعلني من التوابين واجعلني من المتطهرين "
" سبحانك اللهم وبحمدك أشهد أن لا إله إلا أنت أستغفرك وأتوب إليك"
× من السنن الهجورة انه بعد الوضوء تصلي ركعتين وتسمى سنة الوضوء..
× من السنن المهجورة انك قبل ماتخرج من البيت تبي تروح أي مكان قبل ماتخرج تصلي ركعتين بنية يارب ابعد عني كل الشرور في هاي الخرجةوبعد ماتوصل للبيت يعني لمن تدخل البيت تصلي ركعتين شكر لله انك وصلت سالم...
× إطعام الحيوان جيبو صحن بلاستيك وحط فيه حليب وحطه برا في الشارع عشان تشربه القطاو وباقي الحيوانات...تعتبر إطعام الطعام
× صلاة التوبة أول مايعلنون انه رمضان باجر نصلي هاي الصلاة وهي من السنن المهجورة والواحد يصليها إذا سوا ذنب فيصلي هاي الصلاة ويتوب لله بها وحنا حنصليها عشان رمضان دخل ونبي ندخله وحنا تايبين من كل الذنوب اللي عندنا...
× التسامح من القلب يعني نسامح كل اللي غلطنا عليهم..ماينفع ندخل رمضان واحنا حاقدين على احد..
× حسن الخلق " أنا زعيم في أعلى الجنة لمن حسن خلقه"
× داوم على صلاة الله وملائكته كل ليلة يصلون على المتسحرين وحتى لو تسحرت بس بماي.. في تودد أكثر من جذا..ما أعتقد.. ترا التودد أعلى مقاما من الحب..
× أحب دعاء عند الله " يارب أسألك العافية "" اللهم إني أسألك العفو والعافية في الدنيا والآخرة "
× تحري فتح الفتح يوم الإثنين والخميس في رمضان يعني زيد الأعمال في هاليومين لأن الله يشوف اعمال الناس وهم في رمضان يعني يوم الاثنين والخميس..ربنا يطلع ع الأعمال ومن السنة انك تصوم فيه..فما بالك..يوم الاثنين والخميس تنوي صيامه سنة وفرض اللي هو فرض رمضان..عشان كدا يكون فتح الفتح...
× أطلب من الله أن يختم لك بصيام يومك لأنه اللي يموت بعد مايفطر يدخل الجنة ويكون مع السابقين الأولين اللي ربنا يقول عنهم " السابقون السابقون أولئك المقربون "
× اجعل محاميك الصوم يوم القيامة فيجسد ع شكل ثوب فيشفع لك هو والقرآن...
× الحمد الكثير أنه بلغك انك كملت صيامك...
× حدث نفسك بالقيام وأنوي بصدق انك تقوم وعاير الساعة وإذا ماصحيت فلا تزعل لأن الله يتصدق عليك ويخليك نايم ويكتب لك أجر قيام الليل " ما من عبد يحدث نفسه بقيام ساعة من الليل فينام عنها إلا كان نومه صدقة تصدق الله بها عليه "
× لا تنسى تدعي لخوانك في ظهر الغيب روح اسأله شو يبغى منك انك تدعيله وادعي زيادة فوق الدعاء اللي هو يبغيه...
× من كان هينا لينا عتق من النار...
× أنهي الحقوق التي عليك للناس كي تدخل رمضان وقد أديت حقوق العباد واستسمح من ترى أن في قلبه شي عليك ولمن تجي تستسمح ما تقولله سامحني بالعكس جذا مب بسهولة رح يسامحك سيرله واجلس ادعيله وقوله أنا غلطت فيك وأنا آسف والله يوفقك ويسعدك الين يسامحك وجيبله هدايا وارسله رسايل والناس اللي غلطت عليهم أو تكلمت عليهم وتبيهم يسامحونك وانت ماتعرف لهم طريق تصدق وقول هاي الصدقة لكل من اتكلمت عليه أو شايل في قلبه حاجة مني أو علي يارب خليه يسامحني واكثر الإستغفار لهم...
× اطلب الهِداية من الله عن من تخاف عليه من سؤ أحوالهم وروح مكة وطوف عشان تدعيلهم وهذا من التودد في اسم الله الودود عز وجل..وهو من صفات الصديق الصدوق الودود..
× نية ختم القران اكثر من مرة في رمضان..وحطو جدول معين اذا عندكم..
× سوي أكلة بيدك للشغالة والسايق أو اشتريلهم بمصروفك الخاص وعطيهم إياها أو اشتري صحون ورق بمصروفك وقول للبشغالة لاتحطي اليوم الاكل ع الصحون عشان لاتتعبين واليوم هذا يوم إجازة لج وساعديها في غسل الصحون وهاي الأشياء ولو بالقليل...
× اشتري كراتين قوارير ماي ووزعها ع الناس في الشارع قبل المغرب بشوي ووزعها ع المساجد ترا أجر السقي كبير...
× أول مايعلنوا انه رمضان باجر اسجد سجدة شكر إنه الله عز وجل بلغك رمضان..
× إذا تبي تخشع في الصلاة وانت تصلي لمن تقرأ القران اقرأ بصوت إذنك تسمعه حتى تقدر تخشع وفي صلاة التراويح إذا تصلي في مسجد محدد في التراويح فسر الآيات اللي حيقرأها الشيخ وبعدين روح صلي وشوف الخشوع كيف صار عندك..
× قراءة سورة الكهف كل جمعة...
× تقليم الأظافر..يوم الجمعة
× وضع العودة بدل من العطر..بالنسبة للحريم مب تحط العودة وتخرج..وريحة العودة تنشم منها..هذا حرام ومايصير..وتعتبر زانية..اذا شم العودة أي ريال في الدنيا...حتى الهنود والسواقين..ترا مب حلال عليييهم..يشمو ريحة العودة اللي انتيه حاطتها..يعني يوم تحطي العودة حطيها..وقت تكوني مب خارجة بين رياييل...
× يوم أحد يجيب لك هدية من السنة انك تفتح الهدية قدااام..اللي جابلك اياها..
× ويوم تكون بين قوم..يتكلموا بلهجة غير اللهجة اللي انت تتكلم بها..وانت تعرف تتكلم بلهجتهم..من السنة انك تتكلم بلهجتهم...
******************************
هاي بعض السنن اللي جمعتها لكم..واتمنى انها تكون من ضمن جدولنا..اللي رح نسويه لـ رمضان..
وطبعا..ماننسى..المذاكرة..والدوامات..يعني انتوا قسموا أوقاتكم..بطريقتكم..وانتهزوا رمضان شهر الرحمة والمغفرة..واللي عنده اضافات أتمنى انه مايبخل عليينا..
وأتمنى من كل قلبي..انكم تنشرو الموضوع هذا لغيره من المنتديات..ولا تنسوا ترسلوها..لربعكم بالإيميلات..ولاتبخلوا...وابشروا بالأجر الكبير..اللي رح يكون في ميزان حسناتكم بإذن الله..إذا حد سوا أي شي من هـ الكلام كله..
ابدأو من الحين ولا تتكاسلوا...
والله يعينا على ذكره وشكره وحسن عبادته
"اللهم بارك لنا في شعبان وبلغنا رمضان "
ومعنى بلغنا أي اجعلنا من الناس اللي يبلغوا فيه الطاعة
اللهم لا تبقي حاجة في قلب كل من أعان على نشر هذا الموضوع الا أعطيته اياها..واكرمه بما أنت وأنت أهل الكرم والجود والعفو والمغفرة والعافية والستر .. اللهم آمييييييييييييييييين...
وجزاكم ربي كل خير..وفمان اللي ماتنام عينه:)
