قصيدة في مدح عشائر الخرابشة
يا لابتي
بديت بذكـــــــــــــر خلاق البريّة
اشكلها حروفٍ ابجديّـــــــــــــــه
سألت الله مـــــــن فضله عطاني
أبشكر خالقـــــــــي جزل العطيّة
كفانا عـــــــن دروب إبها جهاله
بعد مــــا هو الخوي يذبح خويّه
بعث فينا رسولِ بالهدايــــــــــــه
ينزهنا عـــــــــــن دروب الرديّة
رقينا ليـــــــــن طاولنا السحايب
سطعنا لـــــون شمس الظاهريّه
لنا دارٍ بها مجـــــــــــــد وأصاله
وتاريــــــــــــــخ الجذور الاوليّه
يحق إلك الفخر يـــا بنت صيحي
بعال الصوت لا قلتـــــــي أردنيّه
هذول أهل الكرامــــــــة لنتخيتي
يجونك من علـــــى ظهر المطيّه
تشوفي فعل صلفين الفعايـــــــل
سريّة مير عــــــــــن ميّة سريّة
ولانـــــــــــــا ثابت لحظرة ملكنا
حِمانا مملكتنا الهاشميّـــــــــــــه
نبيع أرواحنا عنــــــــــــد الملاقا
ندوس الموت مــــا نهاب المنيّه
حوافـــــــــــر خيلنا داست عدانا
ولا نطغى وهمتنا قويّــــــــــــــه
عشايــــر سلطنا انجاب السلايل
جميله افعالهم مــــــــا هي خفيّه
ولا به مــــــــــن قصورٍ بالقبايل
ومدحي لابتي حـــــــــــــقٍ عليّه
وأنا يــــــــــا بنت حرٍ خربشاني
أبمدح لابتي صبح ومسيّـــــــــه
بني عودة هلـــــي سم الأ عادي
هــــــل النوماس وأهل المقدريّه
ويــــــــا حيّ السماعين وذكرهم
بياض الوجــــــه وكفوفٍ سخيّه
ونسل فندي مطوِّعـــة الصعايب
كما برقٍ لمــــــــــــــع بالراعديّه
وبني صالح سعيدٍ مــــن نصاهم
وفلاحات الفخر يــــــــا حي حيّه
منازلنا على مـــــــــــد البسيطه
منازل عــــــــــز وامجاد وحميّه
سكنا ســـــــال بشرى وعين جنه
هنيّ اللـــــــي سكن صخرا هنيّه
وفــــي غير الشمال إلنا مظارب
تجـــــــــــي لحديب بالبلقا الأبيّه
وتجـي المظمار والمظري بعدها
يجيــــــــــك الزعتري واليزيديّه
ومـــــن الرميمين والباشا وسند
علـــــى صويلح والانسام العذيّه
ومن عقبه علـــــى درب المدينة
تلاقي ببركه قلوبٍ نقيّــــــــــــــه
عمار الارض من يسكن ظهرها
وحنا وبل غيـــــــــــم الموسميّه
وحنا نكــــــــــرم الضيف ونوده
وحول الجار مــــــــا نلفي بسيّه
وحنا اللـــــــــــي روابطنا متينه
ولا نصغي لقـــــول أهل الوشيّه
وحنا اللــــــــــــي عفينا لا قدرنا
ومــــــــــــن نفسه تعادينا شقيّه
وحنا اللــــــــــــــي ثبتنا بالوازم
ولا نسعا بتدبير الأذيّـــــــــــــــه
سقينا صغارنا دَر الكرامــــــــــة
يموت ولا تَخلا عــــــــــن خويّه
ورثنا الطيب مـــــن منهو سبقنا
وعز النفس والتقوى سجيّــــــة
ألا يـــــــــــــا لابتي شدو عليهن
نهار الصوت مـــــــــا ودّه رويّه
نهار الصوت كـــــــــلٍ فيه ناجح
هلا الفزعات والنفس العليّــــــه
عليكم يـــــــــا كريمين الخصايل
ردودٍ بالنقا مــــــــــــا به وصيّه
طلبني القاف مــــــــا كني طلبته
يزاحمني على حـــــــــب الهويّه
سألت الله يحفظ لــــــــــي بلادي
ويحميها مــــــــن النفس الدنيّه
عساها واحة الأمــــــــن ومقيله
وتبقا علــــــى العدا حره عصيّه
الشاعر : عبدالله الخرابشة
