المسافة وضيق الوقت .. وأشواقنا !
والكلام .. ووجيه المقبليـن السمـر
والسؤال الوحيد اللي من أعماقنـا ..
ودي أسأله قبـل إن الدقايـق تمـر
القدر أو ظروفك .. أيهـم عاقنـا ؟!
قللي إن كان باقي لي بعذقـك تمـر
حسبي الله على اللي سبـب فراقنـا
ما رحم وقفة الذل وعيونـي الحمـر
كل ساعة تعدي تخنـق أعناقنـا ..
كن حروفي حفاة وأرض وقتي جمـر
تدري اليوم .. جالس احسب أوراقنا !
من يصدق تفارقنا بعـد هالعمـر !!
تذكر آخر لقاء والدمـع .. وعناقنـا
كيف كان المكـان بشوقنـا منغمـر
خايف إن الزمان اللي قبـل ساقنـا
للجفا .. يعجبه ما صار ثم يستمـر
وإنت روحي وأنا من ليلة فراقنـا !
أنتظر في مكانـي كـل ليلـة تمـر
