!.......إذا المراجل شماغ وعقاااااال ....!

إذا المراجل .. لبسَـة شمـاغ وعقـال
قـل للنثايا يلبـسـن العمـايـم



ما عاد يفـرق زول حرمـه ورجـال
دام الفعايـل تشبـه البعـض دايـم



المرجلـه مـا هيـب كلمـة وتـنـقـال
وتروح ما راحـت هبـوب النسايـم




وإلا خشونة صوت أو رفـع الأثقـال
أو رزة صـدور وفـعـل الـزلايـم



ولا هي بعد مفتـاح موتـر وجـوال
وإلا ردي لسـانٍ حديـثـه شتـايـم



المرجله شيمه عـن القيـل والقـال
رفيـع نفـسٍ حـر بالجـو حـايـم



المرجلـه عقـلٍ وزن وزنـه جبـال
ودون العقـل وش فرقـنـا والبهايـم



يا مسندي لو مايل الوقت بـي مـال
يا ولـد أبوي يـا عظيـم العزايـم



يا معرب الجدين مـن العـم والخـال
يا نخـوة المفـزوع وقـت الهزايـم



المرجله يا خوي هـي طولـة البـال
هي العـزم هـي الصبـر فالظلايـم



فيهـا الكـرم عِـزه دلّـه وفنجـال
فيها الكرامه عن ردي الطبـع شايـم



والدين لامنـه خـذا القلـب منـزال
مشى طريق الحـق وإبليـس نايـم



ومن لا عرف ربه في طيـب الحـال
لابـد وقـت الضيـق بالهـم هايـم



حتى صلاتك مـع جماعـات ورجـال
في خيرها يـا خـوي نعـم الغـنايـم



ولامن نصف ليلك قم صفـي البـال
يا عظم أجـرك بـيـن ساجـد وقايـم



ولا من رفع ربي لـه كـل الأعمـال
حسن الذكـر لا قالـوا فـلان صايـم



وخَـلك شريف القصد ياطيـب الفـال
سـوء المقاصـد فالبيـوت الهدايـم



واحذر تبـيـع النفس فـي دَب الأنـذال
وتـتـبـع خـوي إبليـس راعي النمايـم



النفس خيـل لـك إذا كنـت خيّـال
ومن لا قوى نفسـه قـوَتـه الهزايـم



ولا صرت ما تدري لـ وِش أنت رجال
والله خسـارة فيـك ذبـح التمـايـم




منقووووووووول