البارحة من هيضي شبيت ضوي
في وسط روض من سنا الضو ضواه
بارض خلا ما طبها احد مهوي
يرتادها الي من عناهي تهوى
ما غير انا والهم فيا متلوي
باقصى معاليقي لجى ثم تلوى
ازل كيفي وان قضى قمت اسوي
كيف النشامى في دلالي مسوى
قامت هواجيسي بفكري تدوي
يا كم وكم طاري على البالي دوى
اكبر هجوسي فوق ناري تعوي
واصغرهم الي في سما الفكر عوى
الهم ينزل والمسرة تطوي
كني اشوف خيام فرحي تطوى
ليلي بقا ثلثه وانا اقول توي
اسمع ضجيج الفكر واقول تواه
العين هلت بالمدامع تروي
خلت بذور العشب منها تروى
على زمان فات من زين جوي
يوم ان فكري صافين فيه جوه
دنيا العنا ما كل من جا تخوي
غلطان من للوقت صادق وخوى
سود الليالي بالمخاطر تشوي
عزا لقلبن من لهبها تشوى
من لوقتاه والنصيب امتثوي
لو يرفعه بالجهد طاح وتثوى
ومن طاح حظه ما نفع به مقوي
ما ينفعه يكود بالله تقوى
النفس تنوي والطواري تغوي
وابليس من طاعه على الدرب غواه
ما ينفعك لا طحت ترديد لوي
وما يرجع الي فات ليت ولواه
هذا ونا بالخير ما جف نوي
يمناي فيها الطيب خيال ونوى
قلبت اوراق البال في جال ضوي
لين ما نور الصبح شعشع وضوى
الشاعر عبد الله المرشدي ( رفيق المطاريش )
