يا عيد خبّرني عن ايامنا ذيك
يا عيد خبّرني عن ايامنا ذيك
................ يوم الفرح أصدق من دموع الاطفال
ذكّرني اكثر عن براءة حواريك
................ثوب ٍ جديد ، وغترة ولعب و رمال
ذكّر صباح العيد عن صيحة الديك
................ و ريحة بخور أمي على ريحة الشال
سِرْ بي هناك اشتقت همس الشبابيك
................ للصدق ، للطيب و صغيرات الآمال
سر بي هناك ، اشتقت بحرك و شاطيك
................ و اتذكر امواجك عى صوت يا مااال
ما احلاك يا عيدي و ما احلى لياليك
................ اياااام راحت بس تبقى على البال
يا عيد وينك ؟ ودنا كلنا نجيك !!
................ بنجيك بكرة أمي و والدي قال ..
تعال شوف أصدق معانيـك ترثيك
................ صارت على سكة حواريك تمثال
بقلوبنا فرحة طفل يستحي فيك
................ وده ينط و يضحك بكل الاحوال ..
وده يطير لفوووق لا مرّ طاريك
................ ويلعب مع اخوانه وربعه والعيال
يضحك و يجهل بعدها ويش تاليك !!
................ ويلبس جديد و غترته فوق العقال
ويروح يلبسها كذا دون تشييك
................ و يعيّد بعمّه لجل ياخذ ريال ..
و يزعج ضيوف البيت لعب و تباريك
................ ويجلس بعيد و يضحك بشر وهبال
ويملي مخابيّه حلاوات و يجيك
................ طاير من الفرحة تقل صابه خبال
وده يعيد العمر و يعيش ماضيك
................ وده ، ولكن للأسف ، صار رجّال !!
لـ الشاعر//عيسى المعيبد
رد: يا عيد خبّرني عن ايامنا ذيك
مشكورة كلمات رائعة
والعيد الي بروح ما بيجي زية
رد: يا عيد خبّرني عن ايامنا ذيك
والف شكر لكما على المرور العطر
رد: يا عيد خبّرني عن ايامنا ذيك
بسم الله الرحمن الرحيم
زهر الربيع
السلام عليكم ورحمة الله وبركاته
كلمات جميله لشاعر جزل المعاني
الله يعطيك العافيه وصح لسان شاعرها
عواد الهران
رد: يا عيد خبّرني عن ايامنا ذيك
قصيدة استهوتني وراقت لي كثيرا
يسلم وصح لسان قايلها وتسلم يد ناقلها .
ومناسبتها قريبة ... هي أيام ويأتي العيد وتأتي معه ذكرياتنا السعيدة
جعل الله أعيادكم وأيامكم كلها سعادة وهناء
رد: يا عيد خبّرني عن ايامنا ذيك