صديق الطفولة وش جـرى لـك مـع الأيـام
هـي أنصفـت دنيـاك والا أنـت بـك مثلـي
فقدنـا ملامحـنـا مـثـل سـايـر الأنــام
عبـث بنـا جـور الزمـن والزمـن يبـلـي
وقفنـا جميـع وبينـنـا حـاجـز الأعــوام
صعيب ٍ وصولي لك.. ويا صعب لك وصلـي
وأنا اشوف في وجهـك طريـق غشـاه عتـام
وذاك النخـل واشــوف دارك ودار أهـلـي
وسدره.. هي أكـرم مـن أهـل بيتهـا اللـوام
وفي وجهك أصحابي.. عصى مدرسي.. وفصلي
وعـود ٍ كبيـر ودايــم ٍ فالـظـلال يـنـام
فـي ذكرياتـي لـه بـعـد ملـمـح وجـلـي
وسـور كتبنـا فيـه ذكـرى عبـث وأوهـام
ولـي فـي عيونـك صـورة زانهـا جهلـي
بثـوب تبلّـل بالمـطـر والـتـراب وشــام
وأنا حب أسيـر الْعَـب وهـي حافيـه رجلـي
أنا وانت طفل وطفـل دايـم رضـى وخصـام
بكانـا سهـل والضحكـة أمـرٍ بعـد سهلـي
دعانـي بوجهـك نــاده ٍ يـنـده الأحــلام
معه رمح مدري هو علي غاضـب.. أو لجلـي
أنا كيف أباصـل والأمـل خلـف مـو قـدام
كثير الأسـى والسِّهـد يـا مـن فعـل فعلي
للشاعر طلال الرشيد رحمه الله
