آآسرك بالشهقه واحررك بازفار
واحياك شهقاتن واموتك زفيري
وابصرك نور وليل شَعرك لي اضرار
مبصر بنورك والجدايل ضريري
يا شبه بيتن بين الاحباب سيار
بيت من اضلاعي بدربك يسيري
او انت عود ولحن حزني لك اوتار
والريش مني وقلب الاحزان طيري
منتوف ريش وما لقى صف الاوبار
افنيت ريشه لك بحبر تعبيري
يجم لك حب(ن) بالاضلاع ما غار
حب(ن) تعذر شوفته عند غيري
يا هو جزا العاشق كما شاف سنمار
يبذل لهم جهد(ن) وحظه عثيري
يا صاحبي واليوم صار الذي صار
وحسايفن تملا يميني ويسيري
اقفل على در المحاحير محّار
اعتم بها البسمه ودمعه ثريري
يصمت لساني والخوافيق مهذار
ودمعن على الاسطار شابه غديري
ياغصن وردن يعشقه حلو الاطيار
يفر لك قلب الشقاوي فريري
عزيز يا غصنن حمى الورد وازهار
لمسك صعيب وصار دربك عسيري
واليوم ياقلبن على كف تذكار
مملوك ذكرى وكان قبله اميري
ذي عادة الدنيا على اليسر واعسار
نوبن فراشك شوك ونوبن حريري
عساك تذكرنا معا مبعد الدار
دارن بعيد ولا سكن فيه ديري
تلقى بقايا حب مع ذرة غبار
تشيلها نود الهبايب تطيري
لا توقف الدمعه على الرمش تحتار
يحيرها عزات نفس وتحيري
خله على خد الشقا دوم مدرار
واحيي بي الشهقه ومتني زفيري
ملك الكلم(محمد الحربي)ات
